Втор протест на граѓаните кои работеле во Ирак и Авганистан

Во најавата испратена до медиумите се наведува дека протестот ќе трае од 12:00 до 15:00 часот, со блокада на раскрсницата на улиците „Моша Пијаде“, „Иво Лола Рибар“ и плоштадот „Маршал Тито“.

Тие ги повикуваат сите граѓани кои се засегнати од, како што велат, неправдата, како и сите кои сакаат да им дадат поддршка, да им се придружат на протестот.

„Нè има многу – од сите градови, од сите националности, луѓе кои со години придонесувале за ова општество, а денес истото тоа општество им врти грб. Ова не е борба на поединци. Ова е борба за правда, еднаквост и достоинство. Ова не е политички протест. Ова е борба против неправдата. Да се обединиме и да бидеме гласни“, стои во повикот.

Додаваат дека не прифаќаат селективна правда, закани, притисоци и ретроактивни толкувања на законите.

Тие тврдат дека данокот го платиле фирмите кои ги ангажирале во земјите каде што работеле, а сега државата во време на празници сака да им наплати уште еднаш.

Минатата недела се одржа првиот протест и беше кажано дека нема да отстапат од протестите додека не им се исполнат барањата, а тоа е  да се повлечат доставените решенија за данок за 2020 година и да им се даде време да ја обезбедат потребната документација која им ја бара УЈП.