Зачленете се во нашиот клуб на читатели и најновите текстови ќе ги добивате на вашата мејл адреса
Започна исполнувањето на најитните барања на месното население од селото Пчиња по минатонеделниот протест поврзан со проблемите и честите пожари на Краста, депонија на која се изнесува целиот смет од Куманово.
Јавното претпријатие „Чистота и зеленило“ изминатите денови ја чистеше околината на депонијата „Краста“, каде што веќе изнело две третини од натрпаниот смет на потегот меѓу месноста Менкова колиба и самата депонија.
„Во изминатите неколку дена расчистивме и го собравме сметот на 5 километри од Менкова колиба кон Пчиња, остануваат уште три. Наполнети се 5 камиони со смет, а продолжуваме со расчистувањето и наредните денови. За кусо време ќе биде исчистен целиот потег каде имаше големи наноси од ѓубре“, истакна директорот Ненад Стојановски.
Се очекува и наскоро да започне поставувањето на ограда и камери на депонијата Краста, и тоа откако два милиони денари ќе бидат одобрени на јавното претпријатие со ребаланс на општинскиот буџет на утрешната седница на Советот. Според проекциите тоа би требало да бидат доволно средства за заокружување и исполнување на двете поставените барања на месното население, кои беа оценети како најнеоходни.
Договорот помеѓу Општина Куманово, ЈП „Чистота и зеленило“ и претставници на МЗ „Пчиња“, за решавање на проблемите се прецизирани во 16 точки.
Зачленете се во нашиот клуб на читатели и најновите текстови ќе ги добивате на вашата мејл адреса
