Дарио се враќа на сцената со "Погрешни зборови"

Мрзеливоста ми помина, периодот на стагнација заврши, сакав да направам нешто што ќе биде квалитетно и добро за публиката. Сакам да внесам динамика во мојата работа, а по Нова година, здравје, за мојот роденден планирам уште една песна - вели Дарио, кој го претстави и видеоспотот за „Зборови погрешни“.

Пејачот вели дека планира да ја презентира на публиката, која веќе некое време чека негови нови мелодии, нов материјал на секои три до четири месеци. План за нов албум сè уште нема, но се надева дека и тоа ќе може да го оствари.

Во Македонија постои еден општ проблем - има песни, има инспирација, но во оваа професија нема пари. Видеозаписот и песната ги изведовме благодарение на „Оне“, кој комплетно застана зад овој проект - вели тој.

Песната и музиката се на Панковски, а аранжманот и продукцијата на Kристијан Габровски. За видеопродукција се погрижи Александар Ристовски - Принц. Ова е целосно нова екипа на Дарио, а на песната како гости се појавуваат Дарко Тасев на гитара и Весна Малинова како придружен вокал.

 Неговото јавување се совпадна со моите планови за соработка со некои мои постари колеги. Песната ја подготвувавме околу еден месец и е нешто поинаку од сè што сме работеле досега. Може да се каже дека ова за Дарио, па и за мене, е нов звук и нов правец - вели Габровски. Принц, кој откри дека е долгогодишен обожавател на музиката на Дарио, чекал 20 години за да добие повик за соработка.

 Сè беше во функција на песната и на идејата, поентата беше да се адаптираме. Единствена моја сугестија беше да не правиме некакви приказни - заклучува Принц.