Кристиан Бергер добитник на специјалната награда „Златна камера 300“

Името на кинематограферот Бергер стана филмска атракција после „Белата Панделка“ (2008) на Михаел Ханеке. Тој и претходно важеше за омилениот фотограф на моментално најеминетниот австриски режисер. Во тандем снимија два од трите филма од првата, австриска фаза Ханеке, наречена „трилогија на смрзнатите чувства“.

„Белата Панделка“ е филмот кој го потврди исклучително високото место во австриската и светската кинематографија на Бергер, закитувајќи се со номинација за Оскар, но добивајќи и десетина други награди во разни краеви на светот.

Бергер е роден во 1945 година во селцето Ланс во Инсбрук, Тирол, Австрија. Негова централна вокација е кинематографијата, но истовремено е и иноватор на тоа поле, режисер на целовечерни играни и документарни филмови и репортажи, се појавува и како продуцент, а некогаш и како сценарист. Во 1973 ја основа својата продуцентска компанија ТТВ Филм.

Негов прв целовечерен наслов е филмот „Рафл“ (1984), за кој уште на почетокот од кариерата се закитува со престижни награди. Следуваат „Хана Чудовиште“ (1989), „Плоштадот Маут“ (1994), „Етички идили“ (1996), а подоцна „Сеќавањата на мртвиот човек“ (2002), „Не прави така“ (2004), „Мојот убиец“ (2005), како и „Неангажираност“ (2007). Во моментов го привршува снимањето на филмот „Лудвиг вториот“, една од најголемите германски филмски продукции во периодот 2011/2012, во режија на Петер Зер и Мари Ноел.