Целта на вакциналниот пасош не е контрола на граѓните

Според стручната јавност најважната цел на вакциналниот пасош е да се зголеми бројот на граѓани кои ќе примат вакцина, што пак, ќе доведе до колективен имунитет. Друга важна работа што ја овозможуваат вакциналните пасоши е да не се дозволува мешање меѓу вакцинирани и невакцинирани на затворен простор, со што се спречуваат нови инфекции. Наспроти тоа што се тврди во постот дека вакциналните пасоши ќе бидат за контрола на населението, тие, всушност, дозволуваат поголема слобода во патувањето, посетување на разни настани и придонесуваат што поголем број на граѓани да се вакцинираат, со главна цел колективен имунитет со 90 проценти вакцинирано население

Фото: Lukas - unsplash.com

Рецензираме пост на Фејсбук во кој се тврди дека единствената функција на вакциналните пасоши е да ги контролира луѓето. Притоа не се прецизира за каква точно контрола станува збор.

Ако вакцината ве штити од сериозна болест, а сепак можете да заболите од ковид и сепак да заразите други, тогаш ЕДИНСТВЕНАТА поента на вакциналниот пасош е да не контролира, се вели во објавата.

Меѓутоа, вакциналниот пасош има неколку улоги и функции, кои не вклучуваат контрола во нив. Како што се вакцинираат сè поголем број луѓе, владите во светот се потпираат на овие пасоши како начин повторно да го отворат општествениот живот. Овие пасоши се сертификати кои покажуваат дека некој е имунизиран против ковид-19, по што рестораните, спортските објекти, трговските центри и другите трговски објекти го користат за да му дозволат влез.

Со добивање на ковид пасош некои луѓе кои не можеа да работат за време на пандемијата, може да работат. За време на пандемијата кога немаше вакцини, сите граѓани се соочуваа со рестрикции на нивната слобода, коишто сега со постоењето на вакциналниот пасош пополека исчезнуваат и тие може да си ги вратат базичните слободи.

Вакциналниот пасош, исто така, нуди големи бенефити во поглед на интернационалното патување. Да се биде вакциниран значи дека се многу помали веројатностите да страдате од сериозна клиничка слика од ковид-19, којшто кога патувате во странство може да направи да ви треба  и хоспитализација во друга држава. Професорот по медицина на Универзитетот во Источна Англија, Пол Хантер вели дека ако болниците во една земја веќе се борат со високи бројки на инфицирани со ковид-19, тие не сакаат луѓето да доаѓаат на одмор од Велика Британија, потоа да заболат од ковид-19 и да бидат дополнителен товар на нивниот здравствен систем. Ако сте вакцинирани, веројатно нема да се разболите со ковид-19 додека сте на одмор…

Ако некој прележал ковид тогаш добива сертификат за прележаност кој покажува дека е имун на ковид и во принцип, ваквиот документ му дава на граѓанинот поголеми слободи да патува и да се социјализира. 

Освен тоа, со поголем број на вакцинирани граѓани, многу побрзо ќе се постигне колективниот имунитет, кој ќе значи дека се вакцинирале над 80 проценти од граѓаните.

Точно е тоа што се тврди во постот, дека вакцинираните може да заболат од ковид и да го пренесат на други. Луѓето кои примиле две дози вакцина може да бидат исто толку инфективни, како и тие кои не се вакцинирале. Иако немаат симптоми, шансата тие да го пренесат вирусот на невакцинираните во домаќинството е 38 проценти. Но, кога сите во домаќинството се вакцинирани, шансата инфициран да го пренесе вирусот е само 25 проценти. Невакцинираните не може да се потпрат на оние кои се околу нив. Вакцините вршат одлична работа во превенцијата на сериозна ковид болест и смрт, но не се гаранција дека 100 проценти штитат од инфекција.

Исто така, има клучна разлика меѓу вакцинираните и невакцинираните, којашто во овој пост не е истакната. А, тоа е дека луѓето кои се вакцинирани, имаат далеку помали шанси да фатат ковид.

Студија објавена во август покажа дека вирусот се чисти од телото на вакцинираните побрзо, отколку од телото на невакцинираните. Просекот за да се исчисти коронвирусот кај вакцинираните е 5.5 дена, а кај невакцинираните 7.5 дена.

Различни експерти велат дека најважната цел на вакциналниот пасош е да се зголеми бројот на граѓани кои ќе примат вакцина, што ќе доведе до колективен имунитет. Друга важна работа што ја овозможуваат вакциналните пасоши е тоа да не се дозволува мешање меѓу вакцинирани и невакцинирани на затворен простор, со што се спречуваат нови инфекции.

Наспроти тоа што се тврди во постот дека вакциналните пасоши ќе бидат за контрола на населението, тие, всушност, дозволуваат поголема слобода во патувањето, посетувањето разни настани и придонесуваат што поголем број на граѓани да се вакцинираат, со главна цел колективен имунитет со 90 проценти вакцинирано население.

 

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар