Во четвртиот бран на пандемијата двојно помалку хоспитализирани во Охрид

Според лекарите, четвртиот бран е полесен за Охрид поради големиот број на вакцинирани граѓани. Последната анализа на Министерството за здравство објавена на 7 септември покажува дека во Охрид дури 61,45 отсто од населението е вакцинирано. Струшката болница, пак, во четвртиот бран од коронавирусот има поголемо оптеретување во однос на третиот. Струга е меѓу градовите со помал опсег на вакцинација, вакцинирани се само околу 40 отсто од населението. Само во месец август од ковид компликации во струшко починаа 29 лица, или речиси секој ден имало по еден смртен случај

Пишува: Соња Рилковска

 

Во охридската болница во четвртиот бран на пандемијата има двојно помалку хоспитализирани пациенти, во споредба со третиот бран.

Најголемиот број на хоспитализирани пациенти достигна до бројка од 52 лица, за разлика од третиот кога бројките беа над 110 пациенти и се бараше кревет повеќе.

Според лекарите, четвртиот бран е полесен за Охрид поради големиот број на вакцинирани граѓани. Последната анализа на Министерството за здравство, објавена на 7 септември, покажува дека во Охрид дури 61,45 отсто од населението е вакцинирано.

Во однос на другите градови Охрид стигна до максимален број на хоспитализации од 52 лица. Тоа беше најголемиот пик и можам да кажам дека овој бран за нас беше многу полесен. Тоа се должи на високиот процент на вакцинирани. Третиот беше ужасен, имавме просечно 110- 120 хоспитални пациенти и уште 40 тина амбулантни, кои ги лекувавме. Не очекувам во овој бран бројот на заболени да расте, вели д-р Горан Балевски директор на Општа болница Охрид во изјава за „Вистиномер“.

Податоците покажуваат дека на удар на четвртиот бран на вирусот, каде најраспространет е делта сојот, се невакцинираните и младите меѓу кои процентот на вакцинирани е доста низок. Дури 90 отсто од хоспитализираните пациенти во овој бран се навакцинирани лица.

Имавме многу малку вакцинирни пациенти и можам да кажам дека сите тие беа со далеку полесна симптоматологија. Имаа релативно лесна клиничка слика. Имаше само два случаи со потешка слика, но морам да потенцирам дека тие имаа многу коморбидитети, сосема други тешки болести. Овој бран донесе многу помлади пациенти, невакцинирани, со бурна реакција и тешка клиничка слика. Имавме и починат 25-годишен пациент невакциниран, кој две недели дома се лекуваше без да побара лекарска помош, додава Балевски.

Лекарите ги охрабруваат младите што посокоро да се имунизираат.

Денес имаме млади луѓе заболени од вирусот, кои само во неколку часа ја менуваат клиничката слика. Овој бран покажа дека и младите не се отпорни на вирусот и дека треба да се вакцинираат што поскоро. Во регионалниот пункт во Охрид се вакцинираа над 60 000 луѓе, а немаше ниту еден случај со алергиска реакција, шок или други несакани ефекти, посочува Балевски.

Моментално во охридската болница има 35 пациенти од кои 20 се на кислородна поддршка. Речиси сите вработени во болницата се имунизирани, тврди директорот Балевски, со исклучок на неколкумина, кои пред брзо време го прележале вирусот, или се лица кои имаат болести што се контраиндикативни на вакцината.

Струшката болница, пак, во четвртиот бран од коронавирусот има поголемо оптеретување во однос на третиот.

Овој бран беше потежок за нас. Бројките на хоспитализирани константно беа високи. Поголемиот дел од пациентите беа невакцинирани. Оние кои имаа две дози на вакцина имаа полесна клиничка слика, вели за  „Вистиномер“ д-р Арменд Арслани, директор на Општа болница Струга .

Струга е меѓу градовите со помал опсег на вакцинација, вакцинирани се само околу 40 отсто од населението. Само во месец август од ковид компликации во струшко починаа 29 лица, или речиси секој ден имало по еден смртен случај.

 

---

Овој напис е изработен во рамките на Проектот за брзо справување со вакциналните дезинформации, имплементиран од Фондацијата Метаморфозис. Тој е првично објавен во Вистиномер, а e овозможен со поддршка на Балканскиот фонд за демократија, проект на Германскиот Маршалов фонд на САД (BTD – The Balkan Trust for Democracy, a project of the German Marshall Fund of the United States). Содржината на написот е одговорност на авторот и не секогаш ги одразува ставовите на Метаморфозис, БТД или нивните партнери.

---

 

 

 

Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар