×
  • Насловна
  • Вести
  • Регион
  • Македонија
  • Спорт

  • Видео

  • Колумни
  • Интервју

  • По допрен глас
  • Репортажи
  • Ретроспектива

  • Погранична хроника

  • Дезинформации
  • ПРОВЕРКА НА ФАКТИ:КОВИД-19
  • Проверка на факти: реформи кон ЕУ

  • Контакт
  • Политика на приватност
  • Импресум
  • Маркетинг стратегија
  • Понуда за рекламирање

  • Flex Credit

    Контраспин: Собранието е со драстичнo намалена ефикасност – спинуваат и ВМРО-ДПМНЕ и СДСМ

    17.05.2022 10:26 | KumanovoNews | Преземено од: vistinomer.mk

    Статистиката што ја употребува ВМРО-ДПМНЕ дека биле поефикасни од СДСМ, но и СДСМ кога говори да се врателе платите и дека 99,5 отсто пратениците од опозицијата блокирале, не смее да се употребува за дневно политички цели. Само еден површен поглед врз бројот на одржани и завршени седници од 2018 до 2021 покажува дека ефикасноста мерена според овој критериум драматично опаѓа, по што произлегува дека пратениците генерално се неефикасни

    Контраспин: Собранието е со драстичнo намалена ефикасност – спинуваат и ВМРО-ДПМНЕ и СДСМ

    Пишува: Теофил Блажевски

     

    Пратеникот од најголемата партија во Собранието ВМРО-ДПМНЕ, Бојан Стојаноски, изнесе статистички показатели за работата на пратениците на опозициската партија, што може да се оцени како спин:

    Спин: Пратениците на СДСМ не си ја заработуваат ниту платата. Во период од јули до декември 2021 година, пратениците на ВМРО-ДПМНЕ имале три пати повеќе активности од тие на СДСМ.

    Во споменатиот период пратениците на ВМРО-ДПМНЕ имале 109 дискусии во Собранието, наспроти 36 од страна на СДСМ. Идентично е и во бројот на репликите каде пратениците од ВМРО-ДПМНЕ имаат 127 реплики, додека тие на СДСМ имаат 83 реплики…

    [Извор: ВМРO-ДПМНЕ – прес/Стојаноски – датум: 12.05.2022]

     

    Контраспин: Статистиката е наука, а кога се користи во дневно-политички цели, таа може да се меси како глина и да се обликува по сопствени потреби. Едно такво парцијално вадење на статистика направи ВМРО-ДПМНЕ, како одговор на исто така неумесноста на барање на СДСМ да пратениците од опозициската партија поради активниот бојкот да ги вратат платите и кои пак спинуваат дека 99,5 отсто пратениците на ВМРО-ДПМНЕ блокирале во Парламентот.

    Спинот или извртувањето на вистината што го прави опозициската партија не се состои во вистинитоста на кажаното, туку во испуштање на два многу важни момента. Првиот е, дека не може само со статистичко прикажување на број на дискусии, реплики или амандмани да се оцени работата на некој пратеник или парламентарна група. Зашто ако е така, Левица со само двајца пратеника, процентуално гледано, можеби е најактивна во Собранието, следејќи ги нивните дискусии и амандмани.

    Вториот момент што е испуштен во излагањето на пратеникот Стојаноски од ВМРО-ДПМНЕ, но и во соопштението на СДСМ,  е вкупниот учинок на овој пратенички состав, чиј мандат се брои или започнува од август 2020 година, по предвремените парламентарни избори што се одржаа таа година во јули.

    Зашто ако се погледне статистиката што ја наведува самото Собрание во своите годишни извештаи и не само за период од две, туку за четири години, ќе се дојде до податок кој кажува дека ефикасноста мерена преку одржани и завршени седници е драстично опадната и континуирано опаѓа:

    Според тие годишни извештаи, Собранието во текот на 2018 година оддржало вкупно 48 пленарни седници, од кои завршени биле 39, а незавршени останале само 9.

    Извор: Собрание на РСМ, 2018г.

    Во 2019 година, во текот на целиот период од јануари до декември, Собранието работи слично, но мала опаѓачка тенденција на ефикасноста е започната – се одржале 49 седници, при што 37 биле завршени, а 12 останале незавршени.

    Извор: Собрание на РСМ, 2019г.

    Веќе во 2020 година, изборна како што рековме, Собранието станува неефикасно (ковид, распуштање на парламентот и слично), па во периодот од август до декември одржале 29 (или 28 – зашто бројката на слајдот и текстот не соодветствуваат) седници, при што завршиле 12, а 17 останале незавршени.

    Извор: Собрание на РСМ 2020г.

    Конечно, во 2021 година – цела година мандат со едномесечен прекин за локалните избори, Собранието одржало исто седници и исто завршени и незавршени како што тоа било во 2020 година за само 5 месеци – 29 одржани, 12 завршени, 17 останале за оваа година.

    Извор: Собрание на РСМ, 2021г.

     

    Како СДСМ ги преброја 99,5 отсто блокади на ВМРО-ДПМНЕ?

    Поради горната статистика, го издвојуваме и спинот на СДСМ искажан во денешно соопштение:

    СДСМ – спин: Неработењето на пратениците на ВМРО-ДПМНЕ граѓаните ги чини над 55.000 евра месечно. Пратениците на ВМРО-ДПМНЕ 99,5 отсто правата блокади и опструкции, а само 05 отсто (гласаат за) решенија за граѓаните

    [Извор: СДСМ – соопштение – датум: 13.05.2022]

     

    Контрапсин: Барањето на СДСМ да им се одземат или да ги вратат платите пратениците на ВМРО-ДПМНЕ поради блокадата е спин, затоа што пратеничката група на ВМРО-ДПМНЕ е во Собранието. Што прави таму и како се однесува е друга работа, но тие се на седници, барем во моментов.

    Она што е, исто така, спин е графиконот што го пласира СДСМ, во кој се наведува дека блокадите и опструкциите на пратенициите на ВМРО-ДПМНЕ изнесувале 99,5 отсто, а во само 0,5 отсто учествувале во расправа конструктивно (според СДСМ) и гласале за решенија во полза на граѓаните. Јавноста останува ускратена за појаснување како е дојдено до оваа „весела математика“, бидејќи тоа недостасува дури и во самото соопштение каде што е објавен овој графикон.

    Оттука, а имајќи ги предвид и статистиките за одржани и завршени седници што ги наведовме погоре, јасно е дека и ова е спин. Зашто, апроксимативно гледано, од некоја ефикасност од 70-80 отсто во 2018 и 2019 година, преку опаѓање од 40-тина отсто во 2020 година, во 2021 година таа ефикасност би можеле да ја сведеме на 20-тина отсто, имајќи ги предвид месеците на работење во 2020 г. (5 месеци) и 2021 година (10 месеци).

    Ова е таа статистика што не ја кажуваат и ВМРО-ДПМНЕ и СДСМ – која, исто така, не е целосна и некој со право може да каже дека не говори целосно за ефикасност, блокадите, заработени плати и слично. Зашто, пак, ако се гледа според вкупен број часови на пленарни седници во 2021 година пратениците поминале 366 часа, во 2020 година 250 часа, во 2019 година 406 часа, а во 2018 година 358 часа.

    Оттаму и заклучокот, дека и ВМРО-ДПМНЕ и СДСМ за ова прашање спинуваат, а факт кој може да се утврди е дека Собранието, сепак, станува сè понеефикасно.

     


    Овој напис е изработен во рамките на проектот Проверка на фактите за напредокот на Северна Македонија кон ЕУ, имплементиран од Фондацијата Метаморфозис. Написот, кој е првично објавен во Вистиномер, e овозможен со поддршка на американската непрофитна фондација NED (National Endowment for Democracy). Содржината на написот е одговорност на авторот и не секогаш ги одразува ставовите на Метаморфозис, НЕД или нивните партнери.

     

     

     

    Сите коментари и забелешки поврзани со овој и другите написи на Вистиномер, барањата за корекции и појаснувања, како и предлозите за проверка на изјавите на политичарите и ветувањата на политичките партии, можете да ги доставите преку овој формулар

    2008 - 2022 Kumanovonews.mk • Сите права се задржани. Текстовите не смеат да се печатат или емитуваат, во целина или во делови, без договор со Kumanovonews.mk