Липково меѓу општините кои не аплицирале со проекти на вториот повик на Владата

„Од нив, 36 општини аплицирале со проекти во вредност од максимумот на финансиски средства кои им следуваат согласно формулата по глава на жител, 27 општини имаат можност да аплицираат со уште проекти до максимум предвидената сума, а 17 општини воопшто немаат поднесено апликативни формулари“, кажа министерот Златко Перински од денешната прес-конференција.

Општини кои воопшто не аплицирале заклучно со вчерашниот датум се: Сарај, Центар, Чаир, Шуто Оризари, Липково, Пробиштип, Валандово, Росоман, Боговиње, Врапчиште, Маврово Ростуше, Теарце, Дебар, Струга, Битола, Крушево и Долнени.

Министерот апелираше до сите локални самоуправи да ја искористат оваа можност и да го запазат законски предвидениот рок за пријавување кој согласно одлуката на Владата е 30.април. 2025 година.

„Оваа програма претставува клучен чекор во трансформацијата на локалните самоуправи и целокупниот развој на земјата.
Затоа, ги повикувам сите општини да ја искористат оваа значајна можност, бидејќи заедно, како партнери, можеме да создадеме подолгорочни и одржливи решенија за иднината на нашите граѓани“, кажа Перински.

Пристигнатите апликации за вториот јавен повик покажале дека најголем интерес во општините има за подобрување на патната инфраструктура, но и изградба на училишта, градинки и спортски сали. 

На првиот јавен повик, кој беше објавен во септември лани, одбрени беа вкупно 288 проекти на 78 општини. Вкупната вредност на проектите е околу 75 милиони евра.

На првиот повик општина Куманово доби 3 проекти во висина од 4 милиони евра, и тоа за изградба на инфраструктура во индустриската зона Речица, гасоводна мрежа до населбата Доброшане и атмосферска канализација на улицата Бајрам Шабани. На вториот повик аплицираше со десетина нови проекти, меѓу кои и изградба на нова детска градинка во населбата Зелен рид.