Црвена Звезда во трка за шампионската титула

Партизан славеше во претходните два дуели од финалето и вечерва (како формален домаќин) имаше шанса да дојде до својата 12. титула по ред во домашното првенство, но не ја искористи првата шанса. Во исклучително драматичен меч (какви што беа и претходните два) кој траеше два часа и 15 минути, Звезда подобро се снајде во последната четвртина која ја доби со 21:13 и, практично, тогаш ја обезбеди победата.

Колку нервозен беше мечот најдобро покажува фактот што беа досудени дури 60 лични грешки од кои три намерни плус две технички, а кошаркарите на двете екипи изведоа 72 слободни фрлања.

Партизан имаше можност да ја заврши работата уште во третата четвртина кога по серија од 10:0 се одлепи на 58:48, но не го издржа темпото и и дозволи на Звезда по 30 минути игра да се доближи на само -1, 60:61. И тука "црвено-белите" не застанаа, па со новата серија од 7:0 на почетокот од последниот период избегаа на 67:61. Партизан успеа да фати приклучок и да поведе со 71:70, но повторно следуваше добра игра на противникот кој со поените на Ракочевиќ, Нелсон и Скот отиде на 77:72.

Во следниот напад Вестерман утна две слободни фрлања, но точка на мечот стави Нелсон кој на 20 секунди пред крајот поентираше за недостижни 79:74.

Голема вина за поразот има капитенот на Партизан, Владимир Лучиќ кој и покрај тоа што беше најефикасен со 26 поени, загуби две важни топки во финишот од мечот. На спротивната страна, прв стрелец беше Ракочевиќ со 18 поени, Савовиќ и Катиќ додадоа по 12, но ништо од тоа немаше да биде важно без кошевите на Нелсон и Скот во финишот.

Четвртиот меч од финалната серија во српското првенство се игра в среда, а формален домаќин ќе биде Црвена Звезда.