Словенецот Коражија ќе го менува Манасков

Словенечкото ракометно лево крило Давид Коражија (30) е замената за повредениот Дејан Манасков, кој поради скинати лигаменти на левото колено на последниот дуел во Лигата на шампионите (ЛШ) против дански Силкеборг ќе отсуствува шест месеци од терените.

Управата на Металург реагираше брзо и веќе се засили со ново лево крило, кое ќе има право да настапи во ЛШ, во Регионалната лига, во домашното првенство и во Купот на Македонија. Се очекува искусниот Коражија (висок 184 см и тежок 85 кг) да остане во Автокоманда до крајот на сезонава, а за понатаму дополнително ќе се решава.

Овој поранешен ракометар на унгарски првак Веспрем и репрезентативец на својата земја, годинава ги бранеше боите на словенечкиот прволигаш Рибница, моментно на 8. место со 16 бода меѓу 12 екипи.

Коражија претходните четири години настапувал за унгарскиот шампион Веспрем. Со него во сезоната 2008/2009 во ЛШ постигнал 11 гола, една сезона потоа 14, во сезоната 2010/2011 реализирал два и во 2011/2012 погодил пет пати. Претходно три сезони настапувал за словенечки Голд клуб Козина, а во сезоната 2006/2007, која му е и најефикасна со 32 гола во квалификациите за ЛШ, настапувал заедно со Ванчо Димовски и со Раде Стојановиќ.

Коражија ќе биде трет Словенец во Металург, по Ренато Вугринец и Миладин Козлина. На левото крило, покрај Коражија, Металург го има и ветеранот Стевче Алушовски.  

Раководствата на Динамо Минск и на Металург ги одредија датумите за осминафиналните мечеви од Лигата на шампионите во ракомет. Првиот натпревар, кој се игра во Минск, е закажан за 14 март со почеток во 19 часот по локално време (17 часот по средноевропско време), во Палатата на спортовите во Минск, со капацитет од 3.300 гледачи. Реваншот ќе се игра на 23 март во спортскиот центар „Борис Трајковски“ во Скопје со почеток во 18 часот.