Административците од Кумановскиот суд утре на протест во Скопје

Протестот ќе започне во 11 часот од пред зградата на синдикатот, а би требало да трае до 15 часот и ќе заврши пред Собранието на РС Македонија.

 „Ќе одиме околу 60- тина луѓе, но и оние кои ќе останат даваат целосна подршка на протестот. Можам да кажам дека имаме 110 отсто подршка, зад нашите барања застануваат и наши бивши колеги, сега пензионери, судиите со кои секојдневно соработуваме, како и Судскиот совет. Барањата се познати 78% покачување на личните доходи и исплата на додатоци на плата кои ги немаме земено од март, значи во последните 6 месеци“, изјави Срѓан Тодоровиќ,претседател на синдикалната организација УПОЗ при Основен суд Куманово.

Судските службеници излегуваат на протест тврдејќи дека 90 отсто од вработените зимаат минимална плата, а спецификата на работното место налага задачите да ги извршуваат врз основа на начелата на законитост, професионалност, стручност и компетентност, одговорност, ефикасност, професионална етика, непристрасност и објективност, сервисна ориентираност, транспарентност и доверливост, како и спречување судир на интереси и економичност. Судските службеници во рамките на својата надлежност се должни да им обезбедат на граѓаните ефикасно и законито остварување на нивните уставни слободи, права и интереси во постапките при судовите.Затоа и им следуваат додатоци на плата поради спецификата на работното место.

Ниските примања значително се одразуваат на стандардот и квалитетот на животот на судските службеници и нивните семејства,со што се принудени на драстични мерки за остварување на своите права како што е закажаниот протест.