Богата програма за „11. Октомври“ - содржини за сите возрасти и вкусови

Програмата започнува во предвечерието на празникот,односно вечерта на 10 октомври на плоштадот Маршал Тито,пред Центарот на култура.

„На 10. октомври, со почеток од 19 часот, па се до после полноќ ќе се одржи овогодинешното издание на Арт Атак фестивал, кој подразбира сплотување на неколку уметности. Оваа година се одлучивме за филмската уметност и електронската музика“, изјави Марио Арангеловски, директор на Фондацијата.

На Арт Атак фестивалот ќе има три ди-џеј сета на кои ќе настапат Мамба Квин, Дадо К и Мамли и Шалајко. Од 20 до 22 часот ќе биде проекција на филм на отворено, за првпат на барање на помладите сограѓани. Ќе се прикажува филмот „Снежана на крајот умира“, во кој настапуваат и двајца актери од Куманово, што ќе привлече внимание кај помладите.

„Филмот ќе се проектира на зелената површина на плоштадот каде ќе бидат поставени лејзи бегс, но и сите заинтересирани можат да си понесат соодветни работи за кои мислат дека ќе им се неопходни за комфорно да го изгледаат филмот. Паузата е поради тоа што истовремено во Центарот за култура ќе гостува престава во рамките на Денови на комедијата. Потоа продолжуваме со музика и ди-џеј сетови во наредните неколку часа“, објаснува Арангеловски.

Во среда, на 11 октомври, со почеток во 10 часот, ќе започне традиционалното полагање на цвеќе на Спомен-костурницата, а од 10-13 часот на Градскиот плоштад Нова Југославија ќе има изложба на олд тајмери постари од 30 години.  Истовремено, пред Центарот за култура ќе се одржи Куманиум, фестивал наменет за најмалите.

„Ќе гостуваат многу аниматори, маскоти од популарни цртани филмови и видео игри, ќе има перформанс на професионален жонглер од Скопје, караоке шоу и триенална изложба на дела од Детскиот ликовен камп АСНОМ создадени во изминатите три години“, додава директорот.

Свеченостите по големиот македонски празник, ќе завршат вечерта со овогодинешното издание на Гитаријадата, која ќе се одржи на малиот плоштад, а ветува богата музичка програма и квалитетни бендови. Гитаријадата ќе ја отвори кумановскиот бенд „Беседа“, по нив ќе настапат гостите од Ниш - бендот Его, а на крај настапува групата Негатив заедно со Ивана Петерс.

Од Фондацијата за култура и спорт изразуваат надеж дека самата агенда и вака креираната програма ќе предизвика интерес кај сите граѓани и ќе ги задоволи разните вкусови на кумановци.