Богата програма за Денот на градот

Со богата културно-спортска програма и повеќе манифестации ќе биде обележан Денот на ослободување на Куманово, 11 Ноември. Активностите за прославата ќе започнат од почетокот на ноември кога ќе бидат пуштени во употреба повеќе инфраструктурни објекти во градот, а ќе завршат со Свечена академија и доделувањето на Ноемвриските награди.

Ќе се организираат спортски настани на републичко и меѓународно ниво. На 10 ноември традиционално ќе се отвори ликовната колонија Куманово, по што ќе следи голем концерт на Градскиот плоштад и спектакуларен огномет. Оваа година ќе пее српскиот пејач Аца Лукас. На 11 ноември ќе се положи цвеќе на Спомен костурницата и Свечена академија- вели Жика Крстевски, раководител на секторот за култура.

 По повод празникот во употреба ќе биде предаден Атлетскиот стадион кај техничкото училиште, ќе биде удрен камен темелник на затворениот базен, а ќе се пушти гасификација во неколку училишта и јавни објекти во градот.  На прославата ќе присуствуваат дваесетина делегации од збратимени градови од Балканот и пошироко.