Давид Стојановски, моден креатор: Сакам кумановки да екпериментираат со модата и да ја покажат својата убавина (видео)

Да се биде моден креатор најважно е да се има желба за учење, за грабење на нови знаења и искуства, да се биде упорен и да се истражува, што води до поубав и пософистициран, а во крајна линија и исчистен дизајн, каков што се бара на пазарот, вели 25-годишниот Давид Стојановски, моден креатор од Куманово, кој допрва зачекорува во светот на модата.

Неодамна, Стојановски ја имаше својата прва самостојна модна ревија во Центарот за култура во Куманово, по повод 40-годишното постоење на оваа културна установа. Неговата ревија, која не беше класична, туку претставуваше своевиден моден перформанс, предизвика голем интерес кај кумановската публика и наиде на позитивни критики.

Младиот Давид има завршено магистерски студии по моден дизајн во Бугарија и досега учествувал на повеќе групни модни ревии, но е горд што својата прва самостојна ревија ја реализирал во родниот град.

„Претставувањето пред своите сограѓани, а особено со прва самостојна ревија, е најголемиот товар што го носиме со себе, најголем страв, но во исто време и најголем предизвик. Модните случувања недостасуваат во Куманово и сакав да го акцентирам овој момент“, објаснува Стојановски.

Неговата колекција ја рефлектира реалноста, она што секојдневно се случува со екологијата и свеста кај луѓето, а на некој начин претставува контраст помеѓу потребите и исцрпувањето на ресурсите, односно нивното прекумерно конзумирање.

„Колекцијата е авторски принт на вода и оган, а од друга страна е збогатена со разновидни рачни изработки и стари техники на боење на материјалите, како и таписеријата. Се работи за една фина и исчистена линија, каде најголем акцент е ставен на наслојувањето на контрастните парчиња облека. Ова е колекција за претстојната сезона есен-зима во која мислам дека секој може да се пронајде“, посочува Стојановски.

Иако млад, тој е свесен дека патот на модата е трнлив и дека тешко се стигнува до публиката и до клиенти, но вели дека професијата е нешто што човекот го носи во себе од раѓање и настојува да се пронајде онаму каде што најдобро се чувствува. Токму, поради предизвиците со кои се соочуваат модните автори во Македонија, и тој, како и останатите главно е насочен во креирање на женска облека.

„Балканот е тежок за работа, така што сметам дека секој од дизајнерите може повеќе да се развива на полето на женската мода. Кај машкот свет постојат строги правила и тие не се доволно подготвени да експериментираат и да отстапат од нив. А, кога говориме за женската мода, постојат луѓе кои се подготвени и сакаат да инвестираат во уникатно парче облека што ќе го имаат само за себе“, појаснува младиот креатор.

Создавањето на моделите за него е процес, што го исполнува и нема посебен „фетиш“, кон одредено парче облека, но кога би морал да издвои, тое би биле костумите.

„Конкретно, најмногу сакам да работам и да се фокусирам на костумите, поточно сакоата, затоа што со нив имам најмногу можност за разработка и експериментирање“, ни открива Стојановски.

Тој смета дека кај нас не може да се говори за висока мода, бидејќи тоа е посебна гранка од модната индустрија во која се работи со посебни материјали,  посебен начин на изработка, а особено посебен начин на претставување.

Истовремено, вели, дека за високата мода во нашата земја се уште нема пазар, односно клиенти кои ќе ја следат и консумираат. Од овие причини, и тој мора да подлегнува на компромиси и понекогаш да работи на производи наменети за широка потрошувачка.

„Преферирам уникатни парчиња облека и уникатна мода, кои клиентите ќе ги имаат само за себе. Но, во некои случаи се посакува и се бара од нас да отстапиме од својата работа и да пристапиме кон она што е во тренд, што е индустриска мода“, вели Давид.

Токму таквите трендови, како што појаснува Стојановски, довеле и до нарушување на модниот стил на кумановки, кои до пред неколку години биле модерни жени. Тој им порачува повеќе да експериментираат и да ја покажат својата убавина.

„Кумановки подлегнаа на светскиот тренд на навлегување на спортскиот стил и спортската облека во трендовите во секојдневието, со цел да се наруши кодексот на облекување во најразличните сфери на општеството. Беа модерни,
но денес им недостасува желбата за експериментирање и покажување на убавото“, смета Давид.

Нема омилен дизајнер, затоа што, како што вели, модата како социо-културен феномен, зависи од многу фактори и секаде се развива различно.

„Во Италија е тој парти стил, Франција го бара чистото, префинетото, веќе Холандија и Данска преферираат нешто многу поразлично, што критичарите дури го нарекуваат грдо. Затоа, не можам да издвојам одреден дизајнер. Ги почитувам сите, затоа што сите создаваме и се бориме за иста цел-светот да изгледа малку поубаво“, објаснува Стојановски.

Сопствениот уникатен стил на облекување го носи со задоволство и вели дека и блиските, и луѓето кои не го познаваат, го прифаќаат и го почитуваат тоа, иако можеби не ги го облекле истото.

„Реакциите се различни. Немам страв, не се плашам да се облекувам поразлично и да го носам тоа што сметам дека е модерно или ми прилега. Поддршка имам секако од луѓето кои се околу мене, па дури и од луѓето кои не ме познаваат, спремни се да дадат пофален збор, па дури и да немаат желба да го пробаат истото“.

Давид има многу планови и желби за својата иднина и градењето на кариера, но во моментов, поради светската пандемија, тие се ставени под знак прашалник. Сепак, вели дека нема да испушти ниту една можност и предизвик за да успее во светот на модата, но и дека никогаш нема да и остане должен на кумановската и на македонската публика.