Детската книга „Чудесен дар во годишен календар“ на Ели Маказлиева промовирана во Куманово

„Кога пишувам книга за деца, првин јас создавам едно дело на кое му давам душа, во неа наоѓам утеха и одмор, релаксација, а потоа ја отворам вратата за децата. И децата тука го наоѓаат својот простор, своето место и ја развивам на тој начин фантазијата, имагинацијата кај децата преку игра, преку забава, со учење на нови зборови и поими“, истакна авторката Ели Маказлиева, инаку магистер по педагогија.

На промоцијата беа присутни дечиња од Градинката „Ангел Шајче“ од Куманово. Настанот беше интерактивен - малку се разговараше со дечињата, се читаше поезија и се зборуваше за тоа која е тајната со која писателот влегува во светот на децата. 

Книгата не може да се натпреварува со компјутерите и вештачката интелегенција, но книгата никогаш не може да го загуби својот примат во развојот, растењето и воспитувањето на децата беше пораката упатена на промоцијата.

Промотор на книгата беше проф.д-р Кристина Николовска, која се осврна на содржината и структурата на книгата, циклусите кои се во неа.

„Чудесен дар во годишен календар“ е книга која ја доби наградата за Најдобра книга за деца и млади „Ванчо Николески“, која ја доделува Друштвото на писателите на Македонија.

„Многу ми значи таа награда затоа што целиот живот работам и творам за децата. Досега имам објавено 40 книги за деца и уште 20 книги со поезија и проза, но целото творештво се круниса со ова престижна награда“, заклучи Ели Маказлиева.