Дирекција за лични податоци со конкурс за основците

Учениците можат да конкурираат со приказна, духовита творба или цртеж. Ќе бидат доделени 18 награди плус уште 6 награди и тоа за: креативност, оригиналност, хумана димензија, визија за иднината, интеркултурализам и најдобар офицер за заштита на личните податоци.

Наградените творби ќе бидат објавени во детските списанија “Развигор“, “Другарче“ и “Наш свет“, а на 28 јануари наградените ученици ќе учествуваат на Националната конференција по повод Европскиот ден за заштита на лични податоци. Целта е преку овој конкурс кај младите да се подигне свеста за заштитата на личните податоци.

Конкурсот е отворен до 31 декември годинава, а творбите треба да се испратат на адреса на Дирекцијата за заштита на лични податоци во Скопје.