Драгица Спасиќ нов в.д. директор на ОУ „Крсте Мисирков“

Спасиќ е дипломиран професор по одделенска настава на Универзитет Св.Кирил и Методиј – Скопје и повеќегодишен просветен работник во истоименото училиште.

Новата директорка вели дека училиштето во кое го минува својот работен век е пример за успешни кадри и одговорни и исполнителни ученици, со кои се гордее нашиот град. Поради тоа е едно од најголемите и најреномираните училишта во градот и затоа што таа верува во неговиот потенцијал ќе го искористи  целокупното свое знаење да придонесе за унапредување на работата во училиштето.

„За успехот на учениците клучна е соработката меѓу воспитно-образовниот кадар во училиштето и соработката меѓу наставниците и семејството, ќе настојувам истата да се развие на повисоко ниво. Преку својот професионален и личен интегритет, високи етички вредности и однесување, ќе ја промовирам својата професија и ќе придонесам за формирање на позитивен став на јавноста кон неа. Подготвена сум заедно со моите колеги да се соочиме со сите предизвици што ги носи новото време, за општо добро и успех на децата кои се наша должност и обврска. Ќе продолжам по патот на успехот остварувајќи ја единствената цел, детето и неговата иднина,“ вели Спасиќ.

(С.Н.)