Два натпревари без публика и казна од 32.000 денари за МКК Куманово по инцидентот со Чаир

Кошаркарскиот клуб МКК Куманово е казнет со два натпревари без публика на домашен терен и паричен износ од 32.000 денари по инцидентот предизвикан од навивачката група на последниот натпревар одигран викендов со екипата на Чаир.

Ова се големи проблеми за локалниот тим, затоа што во разигрувањето за титулата нема да има поддршка од своите навивачи.

Пресметките во четвртфиналните дуели ќе се играат без публика, но зависно од развојот на ситуацијата (крајниот пласман и противникот) можно е и првото полуфинале да се игра пред празни трибини.  

На натпреварот кој се играше во недела, 30 март уште во загревањето се случиле два инциденти, а пред крај на првото полувреме судиите го прекинале мечот во траење од 40 минути. За време на прекинот салата ја напуштиле навивачката група и останата публика, по што се доиграл мечот. На таа средба МКК Куманово го совлада Чаир со резултат 97:74.

Последниот натпревар од регуларниот дел на првенството кумановските кошаркари го играат вечерва во Скопје, против екипата на Вардар. Во овој меч кумановци се фаворити како 4- то пласирани на табелата, додека скопскиот тим се сели во понизок ранг на натпреварување од следната сезона.