Зачленете се во нашиот клуб на читатели и најновите текстови ќе ги добивате на вашата мејл адреса
Режисерката Бојана Краљевска Стојков и сценографот Крсто Богојевски, се прогласени за најдобри во својата категорија на фесивалот за деца и млади „Малиот Принц“ во Штип. Тие работеа на претставата „Црвенкапа“ на Театар Куманово,која својата премиера ја имаше во септември.
Посебно задоволство за режисерката Бојана Краљевска Стојков е што првата награда за режија ја добива токму за детска претстава и со овој ансамбал.
„Ова е прва моја награда за режија, иако имало прилики кога актери или други членови од ансамблот добивале награди во претстави под моја режија. Убаво беше да се работи со инспириран и инспиративен тим, за да се создаде мотивирачко и анимирачко дело за најмалата публика.Целта ни беше да ја пренесеме суштината, на некој начин да оддржиме лекција на децата дека секогаш треба да бидат доблесни- неспорно е дека треба да бидат љубопитни, но и одговорни во одржување на своите ветувања кон најблиските, затоа што токму тие се оние кои најмногу и најискрено се грижат за нив. Многу ми е драго што имаше толкав одѕив меѓу публиката, но и за тоа што и фелата го препозна квалитетот на сработеното. Морам да нагласам дека најголема заслуга има директорот Сашо Тодоровски, кој безрезервно застана зад проектот. Ние секако ќе сработевме, но прашање е дали ќе имавме ваква квалитетна и успешна претстава без неговата поддршка“, истакна наградената режисерка Краљевска Стојков.
Фестивалот „Малиот принц“ се оддржува по 11-ти пат, а годинава во конкуренција биле 5 претстави, вклучително и кумановската. Со свои претстави локалната театарска група настапува третти пат, а куриозитет е што наградата за најдобра сценографија се добива две години, последователно.
„Па така се наредија коцкичките и така одлучило жирито, на мое задоволство. Одевме на модерна, минималистичка сценографија, која по потреба кога ќе се игра на поголема сцена може да се надоградува и да ја дополнува сликата.Но, со овој принцип пак имаме поголема мобилност, полесно можеме да ја пренесеме и да ја одиграме на било која сцена, во било кој град“, потенцира Крсто Богојевски, кој и минатата година ја доби наградата на истиот фестивал.
Драматизацијата за „Црвенкапа“ е на Сашо Костовски, а музиката е на Јован Цветковиќ. Во претставата играат Александра Михајловска, Никица Јанковски, Матеј Стојковски, Владанка Крстевска и Анастасија Величковиќ.
Досега „Црвенкапа“ се одиграла десетина пати, но веќе од јануари ќе биде поставена на малата сцена во Центарот за култура во Куманово.
Зачленете се во нашиот клуб на читатели и најновите текстови ќе ги добивате на вашата мејл адреса
