Зачленете се во нашиот клуб на читатели и најновите текстови ќе ги добивате на вашата мејл адреса
Оваа година треба да се одржат локалните избори. Фер е новите градоначалници да го започнат својот мандат со веќе дефинирани правила на игра во смисла на надлежностите и средствата со кои што ќе располагаат за нивно извршување, веќе од наредната буџетска година, рече министерот за локална самоуправа, Горан Милевски, на консултативниот настан со градоначалниците и други претставници од општините.
- Во однос на нормативната и стратешката рамка мислам дека обезбедивме услови за побрз и одржлив развој на локално и на регионално ниво. Со максимално ангажирање на централната и на локалните власти, но и со поголеми средства за развојни проекти можеме заедно побрзо да ги менуваме условите за живеење во сите општини,- додаде Милевски.
Министерството за локална самоуправа како носител на политиките на рамномерен регионален развој и одржлив локален развој и децентрализација, со поддршка на УНДП и швајцарската Влада ги подготви новата Стратегија за регионален развој 2021-2031 која што е во Собраниска процедура, Законот за рамномерен регионален развој кој што Собранието го донесе на 27 јануари оваа година и Програмата за одржлив локален развој и децентрализација 2021-2026 со Акциски план кои што се готови во фаза на нацрт.
Според Милевски ова се трите најважни документи кои што го определуваат развојот во наредниот период, и Стратегијата и Законот и Програмата, Министерството за локална самоуправа ги подготвуваше во консултација со сите засегнати страни, со ЗЕЛС, со општините, со Центрите за развој, со експертската јавност и со граѓаните. Важно е сите вклучени страни да бидат информирани и да го дадат својот придонес за да може да обезбедиме квалитетна имплементација и на Законот и на Програмата.
- За реализација на средствата од оваа програма јавниот повик ќе го објавува Министерството за локална самоуправа, а покрај Центрите за развој на планските региони и општините, на овој повик ќе можат да аплицираат и јавните претпријатија и јавните установи основани од државата и од општините, како и високообразовните и научни институции и здруженија на граѓани, појасни Милевски.