Французи во посета на Кокино

Гостите од градот Дује, деновиве биле на настава во Гимназијата, ги посетиле Охрид, Скопје и Бигорскиот манастир. Тие направиле проект за презентација за парк во нивниот град и опсерваторијата Кокино, која ќе биде ставена  под заштита на УНЕСКО.

“Според агендата на ред ни е Кокино да се посети. Ќе одиме да видат што Кокино претставува. Водиме 14 ученици и тројца професори. Оваа наша дружба трае веќе неколку години“- изјави Маргарита Теодосиевска, професор по математика во билингвалните паралелки.

Французите велат дека Македонија е мала, но убава земја каде се топло пречекани од домаќините.

“Посетивме повеќе интересни места. Многу сме среќни поради нашиот престој овде. Ова ни е прва година да начекаме сонце, во оваа убава земја Македонија“- вели Сандрин Дина, професорка.

Учениците забележале дека образовниот систем и стандардот се многу поразлични од оној во нивната земја, но им се допаѓаат местата кои ги посетиле.

“Кокино е убаво и уникатно. Вчера правевме проект за него. Во Скопје има многу статуи“- рече Верџир Родолф, ученик.

Француските ученици една недела престојуваат во домовите на кумановските професори од Гимназијата и кај учениците, за да ја запознаат македонската култура, традиција, начин на живеење.