Гори депонијата „Краста“, огнот се затрпува со земја но ветерот го разгорува

„Во текот на вчерашниот ден дојде до потпалување на сметот на депонијата Краста. И покрај обидите на ТППЕ Куманово, сепак не можеше целосно да се изгасне. Работиме и со наша механизација, но потрупувањето оди тешко поради меката, порозна земја и густиот чад кој ја ограничува видливоста за работниците и предизвикува потешкотиите со дишењето. Сепак се прават напори, досега изгаснавме 70% а за останатите 30 проценти очекуваме до крајот на денот да се завршат“, изјави Даниел Стојчевски, директор на ЈП Чистота и зеленило.

 Акцијата се одвива отежнато поради денешните временски услови и ветерот кој постојано дува, но и тешко достапното место. Земјата е обезбедена од залихите на јавното претпријатие и од една приватна фирма која излегла во пресрет на повикот на надлежните.

„Побаравме поддршка од приватни стопанственици кои располагаат со земја која ќе се употреби за санација и една фирма се одѕва на повикот. Се обезбедуваме и од сопствени залихи, постојано се работи на санација на огнот и се надеваме дека очекувањето за брзо завршување на акцијата ќе се исполнат“, додава  Стојчевски.