„Графити Фест“ утре по петти пат во Куманово

Оваа година ќе се работи на потпорниот ѕид кај зградите на улицата „Лесковачка“.

„Во 10 часот ќе се собереме пред ѕидот на кој ќе работиме и ќе се поделат материјалите. Подотвителниот слој е од материјал отпорен на механичи оштетувања и атмосферски влијанија. Боите и се што ни е потребно за работа се обезбедени од наши средства и спонзорство на приватни лица и компании“, изјави Дејвид Стоилковски, од Здружението „Форма“ од Куманово.

Настанот е отворен за публика и замислен е како дружење на кое сите заинтересирани можат да видат како се создава улично уметничко дело.  За нив ќе има забава со диџеј и неколку штандови на кои ќе може да се купи освежување. Забавата ќе продолжи по завршување на проектот, по 20 часот со журка во кафе-бар во центарот на градот.

Концептот на „Графити фест“ е  уметниците и уличните цртачи да внесат свежина со сликање на графити и мурали на сивите и оштетени ѕидови низ градот. 

„Графити фест“ е единствена манифестација во Македонија, која неколку години наназад  дава нов лик на урбаниот простор во Куманово и ги оплеменува запуштените места,  отсликувајќи ја  душата на  уличната уметност и креативноста на младите.