Искривен столб на тениско игралиште опасност за посетителите

Граѓаните кои секојдневно поминуваат тука, велат дека столбот е искривен подолго време, и бараат надлежните под итно да реагираат. 

„Често поминуваме тука и додека се реновираше салата, секој ден поминуваат деца на велосипеди, а и постојано се врткаат работници кои се ангажирани во средувањето на салата. Столбот е искривен за половина метар и секој момент може да падне“, вели Горан Б., кој се обрати до нашата редакција.

Од ЈП „Куманово-паркинг“, кои стопанисуваат со тениските терени, велат дека се запознаени со проблемот, пријавено е на фирмата која ги одржува, и во тек е процедура за санирање.

„Рефлекторите, осветлувањето и столбовите се под надлежност на Општината и фирмата задолжена за одржување на јавното осветлување во градот. Известени се одговорните лица и според мои информации би требало да биде санирано во најкус можен рок. Преземени се сите потребни мерки за што побрзо завршување на работата. Во моментов игралиштата не се користат поради студеното време“, истакна Андреја Маџовски, директор на ЈП „Куманово паркинг“.

Столбот е искривен, затоа што од тежината попуштила и испукала подлогата на која е прицврстен.

Четири тениски игралишта се пуштени во употреба во 2016 година. Изградени се по меѓународни правила на Меѓународната тениска федерација и тука можат да се одигруваат меѓународни натпревари од трет ранг. Секој терен е осветлен со по 4  рефлектори, па терените можат да се користа и ноќе.