Изложба и избор на најубаво велигденско јајце на Градскиот плоштад во Куманово

На манифестацијата ќе учествуваат претставници од основните и средни училишта, здруженија и тимови од Куманово и други општини од Македонија, како и претставници на различни верски заедници со што допринесуваме за меѓуетничка и меѓуверска соработка.

Во рамките на манифестацијата ќе бидат организирани: изложба и избор на најубаво декорирана велигденска кошница, изложба и избор на најубаво велигденско јајце, литературно читање на тема Велигден,  турнир во кршење велигденски јајца и прогласување на најцврсто велигденско јајце.

„Настанот е посветен на велигденските обичаи и традицијата поврзана со чествувањето на големиот христијански празник Велигден и има цел зачувување на традиционалните вредности и надополнување на Велигденските празнувања“, велат организаторите.

 Oваа година ќе учествуваат и ученици кои следат настава на албански јазик, кои заедно со останатите основци и средношколци денеска ќе бидат дел од работилница за изработка и декорација на велигденски јајца и кошници.   

„Минатата година имавме деца од ромска националност, но за годинава учеството го потврдија и ученици кои следат настава на албански јазик. Така се учиме на соживот, заедничко прославување и запознавање со обичаите едни со други“, изјави Драган Цветковиќ, од здружението „Живот“.

Во рамките на настанот „Велигден, ист на различен начин“ распишан е и литературен конкурс за есеј, расказ, драма, поема или било кој друг вид на литературна форма за празнувањето на Велигден, а децата од други националности се охрабруваат да пишуваат и творат на свој мајчин јазик.