Измамници праќаат лажни СМС пораки во име на УЈП, граѓаните да не одговараат

Пораките се испраќани од телефонскиот број +38979212628 со следната содржина: Извршете ја задолжителната пријава на УЈП https://ujp.mk/verifikacija. Овој линк е лажен и не води кон електронска адреса на Управата за јавни приходи.

Управата за јавни приходи апелира да не се отвораат овие СМС пораки и да не се отвора линкот, а доколку некој го отворил линкот, да не ги пополнува полињата во кои се бараат лични податоци од граѓаните, затоа што истите можат да бидат злоупотребени.

Управата за јавни приходи ги презема сите неопходни активности за справување со конкретната ситуација.

Пред неколку дена случно предупредување испрати и Министерството за внатрешни работи (МВР). 

До МВР пристигнале пријави од граѓани за добиенa електронска порака наводно во име на министерот за внатрешни работи, Оливер Спасовски во соработка со полициската канцеларија на Европол, во која во вид на повик за појавување во суд од страна на Сектор за прекршоци, во која примачот на пораката се известува дека е предмет на наводни правни постапки за низа измислени кривични дела, кои ги нема сторено.

Притоа, примачот на пораката се повикува да го контактира испраќачот преку вибер-линк.