Зачленете се во нашиот клуб на читатели и најновите текстови ќе ги добивате на вашата мејл адреса
Преку програмата за помош на човекова безбедност од страна на амбасадата на Јапонија во нашата држава, денеска беше потпишан договор за грант, со кој ќе обезбеди дигитален апарат за ултразвук за Интерното одделение во Кумановската болница, во вредност од 60.000 евра.
Градоначалникот Максим Димитриевски, посочи дека Општина Куманово, има успешна долгогодишна соработка со Јапонија и се заблагодари за донацијата во овој клучен период за безбедноста на граѓаните.
Амабасадорот на Јапонија во земјата, Хиронори Савада рече дека е пресреќен што оваа програма успешно опстојува во Македонија.
„Уште од далечната 1996 година, благодарение на врвните партнери со кои соработуваме, досега имаме имплементирано вкупно 148 проекти, од кои 47 се во здравствените институции. Заклучно со минатата година, сумата изнесува 7 милиони евра. Надминувањето на корона кризата е светски предизвик, и среќни сме што можеме да ги поддржиме медицинските институции во вашата земја. Во рамки на програмата, 6 договори ќе бидат потпишани во февруари, а неколку се надеваме и во март,“ објасни амбасадорот.
Пред 5 години, болницата доби и возило за транспорт на пациентите но и апарат за анестезија, кои се користат во секојдневните задачи.
„Со буџетот кој го имаме како болница, не можеме да набавиме нова, а ниту да ја замениме старата која е амортизирана. Затоа, се обративме до Вас за помош и сме среќни што го одобривте нашиот проект. Со новиот дигитален ехо апарат, пациентите од одделот за интензивна нега и интерното одделение, ќе имаат можност за комплетна дијагностика на самиот оддел, без одење во сосема друг објект,“ рече директорката Снежана Захариева.
Услугите од новата донација, ќе ги користат скоро 200.000 граѓани од Североистокот, бидејќи Опшатата болница во Куманово е единствената во регионот.
(Д.Давитковски)