Кумановци освоија златни медали на Интернaционално натпреварување за бодибилдинг во Битола

Во силна конкуренција од над 50 учесници од Македонија, Србија, Романија и Косово, во машка и женска конкуренција, тие се закитија со највисоки признанија во четири категории.

„Јас овоив две златни медали и два пехари во категориите бодибилдинг до 23 години и до 90 килограми, а Дарио до 19 години освои прво и до 80 килограми трето место. За овој натпревар се подготвуваме само 7 недели, бидејќи немавме многу време, а во пракса за едно вакво натпреварување подготовките трааат од 6 до 7 месеци.  Ова е мое прво професионално натпреварување, иако со фитнес тренинг се занимавам подолг период. Сакав да си ја пробам среќата и задоволен сум од постигнатиот успех“, вели Марио.

Стручната комисија составена од 10 професионални судии го оценувала целокупниот изглед на телото, потоа секој натпреварувач имал задача да се претстави до 1 минута, по што ги бодувале волуменот, дефинираноста и естетиката на мускулот. Вкупниот број на освоени бодови го одредува освоеното место.

Младиот спортист вели дека за да се биде успешен бодибилдер тебе многу дисциплина и одрекување, здрава исхрана и редовни тренинзи.

„Многу значајно е да имаш добар тренер, ние имавме среќа со нас да работи Томе Даневски од Радовиш, познат фитнес тренер, кој и самиот се натпреварувал. Благодарение на него ги достигнавме овие резултати. На ова натпреварување се пријавивме за да видеме до каде сме и колку можеме да постигнеме“, објаснува Марио, кој работи како лиценциран фитнес тренер и досега помогнал  стотина луѓе да направат трансформации на своето тело. 

Тој работи како личен тренер во приватна теретана и онлајн. Вели дека за успех најважно е клиентот да биде упорен и истраен во здравиот начин на живот и вежбањето.

Марио и Дарио веќе се подготвуваат за Државно натпреварување во Скопје, кое ќе се одржи викендов и очекуваат дека ќе постигнат нови високи резултати.