Кумановец осомничен за обид за убиство, неговиот син му помагал

Инцидентот се случил на 2 септември, на раскрсницата помеѓу улиците Киро Фетак и Борис Кидрич во Куманово, кога првиот осомничен со умисла се обидел да лиши од живот едно лице, додека вториот осомничен со умисла му помогнал во тоа, отстранувајќи ги пречките за извршување на кривичното дело.

„Осомничените го забележале оштетениот кој се движел по улицата Киро Фетак со неговиот автомобил и во моментот кога пристигнал на раскрсницата со улицата Борис Кидрич, вториот осомничен за да го спречи да избега, од појасот извадил пиштол од неутврдена марка и калибар, му го попречил патот, застанувајќи пред возилото, го репетирал пиштолот и го вперил во правец кон оштетениот. Тој застанал со возилото, по што до автомобилот се приближил првиот осомничен и од зад грб извадил нож на расклопување.

Најпрвин му се обратил на оштетениот со зборовите 'кој си ти што нѐ гледаш', по што започнал вербално да се расправа и се обидел да му зададе убод со ножот во пределот на градниот кош. Меѓутоа оштетениот ја подигнал левата рака со цел да се одбрани, па осомничениот му задал убоди во пределот на левото рамо. Веднаш потоа двајцата осомничени избегале од лице место“, се вели во соопштението од Јавното обвинителство.

Надлежниот јавен обвинител до судијата на претходна постапка од Основниот суд во Куманово доставил предлог за определување мерка притвор за двајцата осомничени.

О. Пешевска