Куманово го прослави Денот на ослободувањето

Свечена седница се одржа во Центарот за култура каде беа доделени и Ноемвриските награди, а предходно беше положено свежо цвеќе на Спомен костурницата на паднатите борци од НОБ.

„Нашата општина е пример како треба да функционира една локална заедница, како се гради негува соживотот и реално мултиетничко општество. Додека едни само зборуваат за мултиетницизам, ние истиот го практикуваме на дело. Во Куманово нема поделби по ниту еден основ! Во Куманово има место за сите. И за Македонци, Албанци, Турци, Роми, Срби, Бошњаци, Власи, Црногорци, Хрвати, Бугари и сите други заедници се почитуваат и си помагаат меѓусебно. Единствено она што го барам во Куманово е взаемно почитување, уважување, признавање, бидејќи ако сакате некој да ве почитува првенствено треба да го почитувате“, кажа, меѓу другото, кумановскиот градоначалник, Максим Димитриевски.

Годинава, добитници на највисокото општинско признание,  наградата 11 Ноември ја добија Витомир Митевски, член и раководител на центар во МАНУ, Синиша Кашавелски, дипломиран ликовен уметник, хирургот д-р Зоран Ѓорѓиевски, просветниот работник Садри Акифи, и дипломираниот правник, професор и тренер по физичка култура и пожарникар, Сашо Илиевски.

Од правните лица добитници на наградата се Кентаур Импекс ДООЕЛ Скопје, подружница Искра Куманово и АЛФИ Би компани Куманово.

Благодарници од градоначалникот добија Селајдин Шабани, писател, новинар и просветен работник,Основното училиште „Карпош“,с.Умин Дол,  Центар за дијализа „ДиаМед“, Здружение за промоција и равој на инклузивно општество „Инклузива“ и Балетското студио „Ултра“.