Кумановските пожарникари завчера извлекле преживеана жена од урнатините во Адијаман

Тие раскажуваат дека се наоѓаат во местото Адијаман, град во југоисточна Турција, каде што заедно со останатите македонски колеги завчера успеале да спасат една жена.

„Моментално работиме во ноќна смена на разрушен објект од каде завчера успеавме да спасиме еден живот. Се работи за жена која е во добра здравствена состојба. Тоа ни даде уште поголема надеж да продолжиме со сите расположливи средства да пребаруваме“, раскажува Душан Цаневски, еден од пожарникарите.

Тој вели дека она што го гледаат на терен е невидена катастрофа, со многу жртви и повредени, и огромна матерјална штета.

„Во голема паника се преживеаните за нивните најблиски, секој час се намалуваат шансите да најдеме преживеани под урнатините. Досега извадивме околу 50-тина починати, се очекува бројката да расне. Ние продолжуваме со нашата цел, да спасиме и помогнеме“, додава Цаневски.

Градот Адијаман е во близина на сириската граница и скоро целосно е разурнат.

Турција има долга историја на силни земјотреси. Над 17.000 настрадаа во силниот земјотрес во август 1999 година во градот Лимит, кој се наоѓа на 90 километри југоисточно од Истанбул. Пола милион луѓе тогаш останаа без своите домови.