Кумановските пожарникари ќе бидат наградени со по една плата за хуманoста во Турција

Пожарникарите Игор Кузмановиќ, Стефан Крстевски, Александар Денковски, Владица Младеновски и Душан Цаневски денеска се сретнаа со градоначалникот Максим Димитриевски, кој им врачи благодарници и им се заблагодари за храброста, пожртвуваноста и помошта која ја пружија на терен.

„Браво момци, достојно ја претставивте нашата општина и нашите вредности на хуманост и солидарност, постапувајќи со висок професионализам и безусловно помагајќи на нашите пријателски народи кога е најпотребно. Во лично име и во името на нашите граѓани ви благодарам на сите кои несебично пружија помош, имаме пожарникари со кои можеме да се гордееме, пожарникари- спасители кои секогаш се подготвени на своите работни задачи. Куманово е отсекогаш солидарен град и горд сум на тоа“, изјави  Димитриевски

Кумановските пожарникари беа дел од спасувачкиот тим во градот Адијаман, во југоисточна Турција, каде со останатите македонски колеги успејаа да спасат една жена.

„Ова е едно големо искуство за сите нас, веднаш штом отидовме таму, првата работа што беше е спасување на жена. Тоа ни даде дополнителен мотив повеќе да се посветиме на работата, но за жал немаше преживеани. Работевме со тешка механизација и дадовме се од себе. Многу добри но и лоши моменти ќе ни останат во сеќавање“, изјави Душан Цаневски.

Куманово беше една од првите Општини што се отповика на меѓународниот повик за помош на Турција и Сирија. Издвои финансиска помош од 1 милион денари и прати спасувачка екипа.