Лулзим Нуредини нов командант на касарната „Боро Менков“

Нуредени досега ја извршуваше должноста началник на секција во прва механизирана пехадиска бригада во Петровец, и доаѓа на местото на досегашниот командант потполковник Али Хајро на кого му заврши мандатот. Свеченост за примопредавање на должноста командант на касарната денеска се одржа во касарната „Боро Менков“.

Денес е таков ден во кариерата на двајцата офицери. Едниот ја предава командата над баталјонот и заминува на друга должност, а другиот ја превзема командата над баталјонот и ќе продолжи да го води - рече полковникот Зоран Милески на свеченоста.

Потполковник Али Хајро се заблагодари за почитта и соработката на колегите. Истакна дека на боевите стрелања имале добри резултати и овие 3.5 години поминале успешно.

Никогаш немојте да ги заборавите овие резултати. Ретки се луѓето што носат униформа, а имаат такви добри резултати. Мило ми е дека бев ваш командант и ме почитувавте до последен ден. Затоа сум ви благодарен - кажа Хајро.

Нуредини во својот говор рече дека новата должност за него претставува чест и поголема одговорност. Ова е нов предизвик во неговата кариера и се надева дека ќе биде успешен.

Сакам да му се заблагодарам на досегашниот командант потполковник Али Хајро за лидерството со кое досега ја водеше единицата и ги менаџираше сите процеси, за достигнатиот степен на обученост и борбена готовност на баталјонот, со желби за добро здравје, среќа и успех  на него и неговото семејство. Ние што остануваме, продолжуваме понатаму, критериумите се поставени, целите се јасни - изјави Нуредини.

Нуредини е роден во 1977 година во Кичево. Средно образование завршил во родниот град, а потоа се образувал на Воена академија во Скопје. Учествувал на меѓународни вежби, обуки, курсеви.