Млади кумановци снимаат филм за проблемите на тинејџерите во модерното општество

Критика на модерното општество преку проблемите на младите е тема на аматерскиот филм „На колена“, што го снимаат двајца млади кумановци. Филмот е во продукциска фаза, а на него работат режисерот Предраг Анѓеловски и продуцентот Милан Богдановски, кои заедно го направиле сценариото.

„Го средивме сценариото за да ни се допадне нам, а потоа направивме тим со кој ја започнавме продукциската фаза. Презадоволни сме од актерите кои се вклучени, сите се дојдени со амбиција и желба да направиме добар филм. „На колена“ е критика на денешното модерно општество во кое живееме, а фокусот е на младите. Овој проект е резултат на потребата да се зборува за проблемите кои ги имаат тинејџерите во 21-от век, односно нашата реалност“, вели продуцентот Богдановски.

Двајцата пријатели веќе подолгo време се подготвувале да се докажат со филмско остварување и работеле на повеќе идеи за да создадат свое дело.

„Предраг и јас се знаеме одамна, и во тој период разменивме голем број на идеи. Соработката ја започнавме на почетокот на годината, кога тој ми го презентираше сценариото и ми предложи да бидам продуцент. Екипата е составена пред се на пријателска основа и имаме одлична атмосфера помеѓу нас. Наидуваме на разни препреки, но тие се нормални кога се реализира проект. Предраг е окупиран со анализа на филмските класици, но и оние кои се потценети од јавноста. Јас моето искуство во снимањето и сликата како општ поим, сакам да го искористам во нешто поголемо, во овој случај нешто ново во нашиот град,“ објаснува Богдановски.

Актерската екипа ја сочинуваат: Кристијан Петковски, Валентино Цветановски, Јована Милошевска, Марија Милошевска и Бранко Стојковски.

Филмот се снима на повеќе локации во Куманово, на отворено и во затворен простор. Подршка и помош добиле од неколку локални општествено одговорни фирми кои се согласиле да им излезат во пресрет со ослободување на студио, шминкање, фризура и други реквизити.

Сценариото на нивниот филм влегло во потесен круг за избор на аматерски сценарија на најдобриот фестивал  ПриксРојал  Париз, во конкуренција од 153 во Европа.

„ Пред неколку недели добивме известување дека сме помеѓу 12 најдобри, а на следното одлучување ќе бидат најдобрите 10 кои ќе добијат награда,“ додава Богдановски.

Авторите имаат амбиции филмот да биде прикажан во кино салите, но и на ТВ екраните, а планираат да се пријават и на повеќе државни, но и меѓународни фестивали.

(Д.Д.)