На вандалите никој ништо не им може, повторно уништена урбана орема на Градскиот кеј

„Повторно вандалско однесување на несовесни граѓани на Градскиот кеј и во паркот кај градскиот базен, повторно направена штета врз урбаната опрема и малите дрвја. Од каде и да се почне да се елаборира проблемот, факт е дека ниту една психолошка дефиниција на вандализмот нема да даде разумно објаснување за она што во Куманово веќе станува хроничен проблем. Меѓу нас живеат вандали чие нарушување оди дотаму што речиси и да нема ден, а да не се случи по некој деструктивен чин на уништување на јавните добра. Апелираме на совесно и одговорно однесување на сите граѓани при посета на градскиот кеј и сите други паркови“, апелираат од  ЈП „Чистота и зеленило“.

Граѓаните се револтирани од ваквото однесување на поединци и бараат надлежните служби, пред се МВР и комуналните редари, наместо само да ги нотираат случаите ревносно да си ја вршат работата, а сторителите да ги казнат.

„Тоа е иста група, која прави бељи по цел град. Не е можно никој да не ги видел и да не може да се открие. Најверојатно се тинејџери, за кои родителите треба да поведат сметка“, коментираат граѓаните. 

Меѓу нивните барањата се и општината да постави видео надзор на местата кои се постојана мета на вандалите, но во една прилика градоначалникот кажа дека тоа е скапа инвестиција за која општината нема предвидено средства.