Два кружни тека и над 130 проекти реализиравме за 1 година во Куманово, тврди Димитриевски

Во претходниот негов четригодишен мандат потседтува дека се реализирале над 400 проекти за граѓаните и целосно биле вратени долговите на Општина Куманово, осврнувајќи се на тоа дека заедно со својот тим, продолжува да работи посветено, отчетно и транспарентно исклучиво за граѓанските интереси, испорачувајќи дела за кумановци.

„Помеѓу проектите кои се реализирани во првата година од вториот мандат се 2 нови кружни текови на крстосниците помеѓу бул. “Трета МУБ” и бул. “Октомвриска Револуција”, како и помеѓу улиците “Бајрам Шабани”, “Гоце Делчев” и бул. “Трета МУБ”, асфалтирани улици во површина од околу 50.000 м2, 20.000 м2 поставен бекатон, 8.000 м атмосферска и фекална канализација, 80.000 м2 тампонирање на улици и патишта во текот на изминатата година“, стои во соопштението на градоначалникот. 

Дополнително се наведува дека се реконструирани 3 средни училишта, извршена е реконструкција во 5 основни училишта, изградени се 5 нови модерни мултиспорт игралишта со тартан подлога, во тек е реконструкција на Спортската сала, завршена е реконструкција на патеки во Градскиот парк,  набавени се 12 нови возила и механизација за јавните претпријатија во Куманово во вредност од 1.000.000 евра. 

Покрај сите наведени проекти во делот на инфраструктурата, образованието и спортот, се додава дека активно се води сметка и за животната средина, се чисти речното корито и дивите депонии, поставени се мерни станици за мерење на квалитетот на воздухот на повеќе локации,  40 нови полуподземни контејнери во централното подрачје, 1000 нови контејнери во приградските населби и селата, како и над 1300 засадени садници.