Наградата „11 Ноември“ за Витомир Митевски, Синиша Кашавелски, Зоран Ѓеорѓиевски, Сашо Илиевски, Садри Акифи, „Алфи“ и „Искра“

Наградени се Витомир Митевски, член на Македонската академија на науките и уметностите (МАНУ), Синиша Кашавелски, дипломиран ликовен уметник, Зоран Ѓеоргиевски, лекар специјалист по општа хирургија, Садри Акифи, просветен работник во пензија и Сашо Илиевски, дипломиран правник и професор по физичка култура, сите за афирмација на градот. Наградените ќе добијат дипломи и ќе ја поделат паричната награда од 100.000 денари.

Од правните субјекти наградени се ДПТУ „Кентаур импекс“ Скопје, подружница „Искра“ Куманово и Трговското друштво за вработување лица со попреченост „Алфи Би Компани“ Куманово.

На конкурсот пристигнале 34 пријави, а изборот го направи Комисијата за одбележување празници, манифестации и доделување награди и признанија на Советот на Општина Куманово. Претседател е советничката Невена Величковска од ВМРО-ДПМНЕ, која денеска ги соопшти имињата на наградените. 

Наградите ќе бидат врачени на свечената седница на Советот на Општина Куманово на 11 ноември во салата на Центарот за култура „Трајко Прокопиев“.