Зачленете се во нашиот клуб на читатели и најновите текстови ќе ги добивате на вашата мејл адреса
Вкупно 235 ученици од основните и средни училишта во Куманово се отпишале од почетокот на учебната 2022/23 година, затоа што со семејствата се отселите во странство или во другите општини во земјата.
Повеќе отпишани ученици има во основните училишта и тоа во проценти изнесува околу 2 отсто од вкупниот број на запишани ученици, во однос на средните училишта каде процентот изнесува 1,4 отсто.
„Во учебната 2022/2023 година во општинските основни училишта до 02. февруари годинава, отпишани се вкупно 201 ученик од вкупно 10.097 запишани ученици. Од отпишаните ученици, 37 ученици се отпишани поради преселба во друга општина во Македонија, а 164 ученици се отпишани поради преселба во друга држава“, велат од Секторот за образование во Општина Куманово.
Во општинските средни училишта се отпишани вкупно 34 ученика од 4.126 запишани ученици. Од нив 18 заминале во странство.
Минатата учебна година година била уште полоша, па од вкупно 10.209 ученици 220 се отпишале во текот на годината. Од нив 155 заминале во странство, а 65 се преселиле во околните градови.
Од четирите средни училишта се отпишале 60 ученика, од кои 54 ученици заради преселба во друга држава.
Празнењето на основните и средни училишта во Куманово не е ново, и трае со години, како и во другите градови во државата. Причините се добро познати, падот на наталитетот, општинската миграција, но највеќе поради иселувањето на цели семејства од државата.
Зачленете се во нашиот клуб на читатели и најновите текстови ќе ги добивате на вашата мејл адреса
