Одбележан Денот на пожарникарите

Од ТППЕ Куманово рекоа дека со 8 исправни возила и со педесет вработени се подготвени за претстојната летна сезона, кога ќе имаат повеќе работа.

“ Оваа година со оглед на состојбите во нашиот град, одлучивме да не правиме вежби како обично, туку со мал коктел да го одбележиме нашиот празник и да ги повикаме луѓето со кои соработуваме, кои ни се блиски како по служба, така и приватно. Досега имаме 184 интервенции, што во просек е како и секоја година. Во летниот период ќе има повеќе пожари, доста добро сме екипирани“ - изјави Деан Илиевски, командир на ТППЕ Куманово.

Пожарикарите објаснија дека на 9 и 10 мај додека траеја вооружените дејствија, интервенирале во населба Тоде Мендол при што изгасиле неколку запалени куќи и извлекле над 20 цивили, за што никаде јавно не биле пофалени, ниту спомнати.

“Од полиција не повикаа таму, нашата работа е таква и веднаш отидовме. За жал досега не бевме ни спомнати на ниту една национална телевизија, освен во локалните медиуми. Тоа е голема неправда. Бевме под силно полициско обезбедување, се пукаше на сите страни“- вели Даниел Илиевски, пожарникар.

Најмладиот пожарникар 24- годишниот Стефан Крстевски вели дека нивната работа е ризичка, но и хумана.

“Опасно е , никогаш не се знае на каков пожар ќе налетаме. Помладите треба да учиме од постарите, бидејќи ова е екипна работа“ - рече Крстевски.

На коктелот пожарникарите дискутираа за интервенциите кои досега ги имале, но и за предизвиците кои ги очекуваат во наредниот период.