Општина Куманово има проект, но нема пари за реконструкција на мостот во Пчиња и бара странски донатори

Според груба проценка на градоначалникот Максим Димитриевски, реконстукцијата би чинела околу 300.000 евра.

„Веднаш по доаѓање како градоначалник пред 5 години, порачав проект за целосна реконструкција и проширување на мостот. Општината го плати проект, бидејќи тоа е траса од регионално значење која ја поврзува општина Куманово со општина Петровец. Ние првично разговаравме во Министерството за животна средина со кои работиме на затворање на депонијата Краста, и добивме ветување од тогашниот министер дека ќе се инвестираат во мостот, но тоа не се случи. Општината нема капацитет да го реши проблемот сама и затоа аплициравме со два проектот кај европски донатори, за реконструкција на мостот во село Пчиња и за изградба на нов мост во село Довезевце на Крива река, и чекаме одговори“, кажа Димитриевски.
  
Проблемот со мостот на реката Пчиња е присутен повеќе од 10 години, откако во поплавата во 2013 година е оштетен од надојдените води. Жителите на селото Пчиња и соседните села, се жалат дека им е загрозена безбедноста додека се движат по мостот, бидејќи двата главни столбови се оштетени. Тие кажуваат дека откако мостот е оштетен бараат помош од сите државни и локални институции, но безуспешно. Пред секои избори ги посетуваат политичари од сите партии, но решение за нивниот горлив проблем се уште нема.

 Мостот е изграден во седумдесетите години на минатиот век од тогашната ЈНА, и досега не е поправан.