Отворена изложбата на слики „Марини“ на Ацо Таневски

Роберт Цветковски, историчар на уметноста, на отворањето на изложбата кажа дека станува збор за многу активен и плоден автор, кој работи на морскиот пејзаж и водата, а морските делови ги претставува на еден свој посебен начин.

„Тоа го прави со тоа што во самата композиција водата ја позиционира на централното место на платното, а потоа во содејство на земјениот пејзаж прави интересни структури и сето тоа го надополнува со едни специфични обработка, која се темели на една носечка боја и всушност таа боја на некој начин се градира и претставува атмосфера, која самата слика ја носи во себе. Може да се забележите дека човекот е потполно апстрахиран, што говори за неговите размислувања на релација човек природа, бидејќи смета дека однесувањата на човекот кон природата се погрешни и урбанистичките зафати ја деградираат природата“ кажа Цветковски.  

Авторот Таневски се заблагодари на поддршката и на укажаната доверба да ги претстави своите дела за првпат во Куманово.

И во ова време-невреме не смееме да се предадеме и мора да се среќаваме. Да се надевам дека ова нема да трае уште толку долго, брзо ќе заврши ова лудило и ќе почнеме да се видуваме и да продискутираме за уметноста и да уживаме во не“, рече авторот Таневски.

Ацо Таневски роден 1965 година во Скопје. Завршил средно уметничко училиште во 1984 год. како и Факултет за ликовни уметности (педагошки, отсек сликарство) 1991 во Скопје. Член на ДЛУМ од 1993 година, и активен член на Сојузот на ликовни педагози.

Во моментот работи како ликовен едукатор во Национална галерија на Македонија. Организатор на едукативни работилници и изложби за млади. Освен со ликовна, се занимава и со театарска и книжевна уметност. Учесник на преку 100-ина групни изложби во земјата и во странство, како и на 40 - тина ликовни колонии.

Изложбата во Куманово ќе биде поставена до 14.04.2021 година.