„Покажи што знаеш“ - работилница за деца на платото пред Центарот за култура во Куманово

На настанот ќе бидат присутни и актерите Анастасија Величковиќ, Марко Трајковиќ и Никица Јанковски, кои ќе се дружат и ќе им помагаат на најмалите кумановци.

Првата ваква работилница се одржа пред десетина дена и предизвика внимание и голем одзив кај најмалите.

„На првата работилница беа присутни 50-тина деца, па решивме да го повториме настанот. Активноста е замислена како можност децата да покажат креативност, талент и умешност во цртање и боење, рецитирање, пеење или било која уметност каде се пронаоѓаат и занимаваат. Утревечер ќе правиме оригами, традиционална јапонска техника за изработување на декоративни облици и предмети од украсна хартија“, изјави директорот Сашо Тодоровски.

Украсна хартија, листови, боици и моливи и сите други материјали ги обезбедува центарот. Заинтересираните треба само да дојдат и да се вклучат во игрите и забават со другите деца.

„Ќе се намести и озвучувањето, па ќе можат и да настапат дечињата со некоја своја точка. Намерата е да се анимираат со нешто во долгите летни денови оние дечиња, кои не се на одмор на некоја летна дестинација. Се надевам дека ќе го повториме успехот од 17 јули. И ова не е последна ваква работилница, следната е планирана за првата половина на август“, дополнува Тодоровски.

„Покажи што знаеш“ е проект на Центарот за култура Куманово и е дел од нивната летна програма.

Во последните неколку години на платото пред Центарот често се одржуваат неформални средби, работилници, концерти, детски претстави, изложби кои го збогатуваат културниот и забавниот живот на градот.