Премиера на претставата „Ковачи“ утревечер во Центарот за култура

Директорот Сашо Тодоровски вели дека претставата се подготвувала два месеци, станува збор за одлична комедија и извонредна актерска екипа, за која ќе се бара карта повеќе.

Во претставата „Ковачи“ се испретплетува судирот помеѓу истокот и западот, борбата помеѓу големото и малото, матерјалното и традиционалното. Во мало гратче населението живее мирно и по свои правила, се додека во него не се доселува еден Балканец.

„Станува збор за една, прилично апсурдна комедија. Дејствието се случува во Германија, во едно мало гратче – Оснабрик,  кое според авторот, за потребите на делото, е прогласено за најсреќен град во Германија. Она што е интересно во текстот и особено видливо во претставата е судир на тие две култури, западната, кон која сите стремиме и онај, наш балкански менталитет. Ова е интересен театарски производ, забавен пред се, во која мислам дека публиката ќе ужива“, изјави режисерот Дамјановски.

Актерската екипа ја сочинуваат: Антонио Димитриевски и Кети Дончевска – Илиќ кои ги имаат главните улоги во претставата, а играат и Горан Илиќ, Нина Максимова, Жарко Јовановиќ, Давид Илиќ и Марко Трајковиќ.

Според актерот Димитриевски претставата е битка на цивилизации, на источен и западен, за судир на малиот човек, малите народи, кои се безгласни букви и нивната вековна борба, стремеж кон зачувување на својот идентитет и нивните вредности да го добијат местото кое го имаат западните култури и големите народи.

 „Јас го играм ликот на Долф, кој што е претставник на лицето на германското општество, кој живее под стаклено ѕвоно во еден рај којшто е стерилизирана средина, дури и наликува на режирана стварност. Нема тага, нема радост, нема љубив, нема страст се до еден момент“, вели Димитриевски.

Актерот Горан Илиќ во претставата е протестански свештеник, кој се бори против матерјализмот, но неможејќи успешно да се избори и тој се прикучива кон него, во еден момент дури и на вулгарен начин.

„Скоро сите ние тоа го чувствуваме, судирот меѓу посебното и глобалното и нашата немоќ тоа да го пренебрегнеме. Ова е наша мала одмазда како ние гледаме на тој западен свет, на свет во кој во 21 век доминира задоволството што е ефтина замена за среќа. Но, ние сите наседнавме на тој материјализам“, потенцира Горан Илиќ.

Младиот Жарко Јовановиќ игра два лика во претставата, улогата на водител на реално шоу и 27- годишниот Бруно, кој потекнува од германско семејство и ништо не работи.

Дончевска - Илиќ истакна дека низ годините наназад кумановскиот театар има претстави кои публиката ги гледа по неколку пати, а утрешната премиера е токму тој тип на претстава.

Сценографијата е на Филип Јовановски , а костимограф Елена Вангелова.

Карти за премиерата можат да се купат на билетарата на Центарот за култура.

О.Пешевска