Зачленете се во нашиот клуб на читатели и најновите текстови ќе ги добивате на вашата мејл адреса
Кумановскиот музеј започна со ископување на локалитетот Градиште во Младо Нагоричане, кој датира од 4-3 век пр.н.е., а археолозите пред неколку години открија остатоци од голем, масивен ѕид.
Како што информира археологот Дејан Ѓорѓиевски, ископувањата се насочени околу овој ѕид, за кој се' уште не е дознаена првобитната функција, каде што постојат доградувани и преградувани простории, некои од нив и всечени во карпата.
Материјалот кој е пронајден од локалитетот датира во периодот на 4-3 век пр.н.е. Станува збор најчесто за локално работена керамика која ги имитира формите од егејскиот југ, но и за помала количина на импортирана керамика од тој регион.
“Формите на накит пронајдени досега претставуваат исто така импорти, со познат изглед типичен за медитеранскиот регион во тој период. Преку него индиректно се согледуваат и религиските верувања на народот кој живеел на локалитетот, а кои скоро во целост биле изградени според грчкиот пантеон, се разбира, со додадени локални карактеристики”, објаснува Ѓорѓиевски.
Воедно тој додава дека локалитетот е особено интересен за проучување, токму поради високиот цивилизациски развој на локалното население, посведочен преку многу архитектонски елементи за кои што паралели се наоѓаат во пајонските и македонските престолнини.
Ископувањата се дел од годишната програма на НУ Музеј Куманово, финансирана од Министерството за култура.
(Ф.Марковска)