Промовирана новелата „Што ми остана од тебе“ на Ана Љубиќ

Промотoр на книгата беше Христина Алексовска, директорка на Градската библиотека, која потенцираше дека книгата е приказна за вербата, надежта и љубовта кои треба да се пронајдат.

„Ова е еден краток роман или новела, насловен „Што ми остана од тебе“ каде има повеќе теми и мотиви: љубов, копнеж, надеж.Сите нешта кои се всушност дел од нашиот реален живот. Ова е еден чекор плус за мене и во иднина ќе ме очекуваат поголеми предизвици и се надевам, уште поголеми успеси“, изјави Ана Љубиќ.

Љубиќ не е дебитант на книжевната сцена, но за прв пат објавува прозно дело по книгата со поезија „Ловец на соништа“, која е издадена пред 5 години.

„Кога сум пак пред мојата публика можам да видам дека моите дела живеат, траат и дека во нив се пронаоѓаат сите генерации. Се надевам дека во наредните 5 години, и воопшто во иднината ќе излезе уште нешто посилно, поинакво и исто ќе остави траг кај читателите“, истакна авторката Љубиќ.

Ана Љубиќ има 23 години и е студент на Филолошкиот факултет „Блаже Конески“ во Скопје, на катедрата за македонска книжевност и култура.