Протестираа здравствените работници од Општа болница, Здравствен дом и Центарот за јавно здравје во Куманово

Тие со получасовниот протест во дворот на установите го изразија своето незадоволство поради доцнењето на платите и непотпишување на колективниот договор за покачување на платите.

„Беше подадена рака уште во мај минатата година, иако не остваривме средба со премиерот. Денеска сме тука сите заедно од администрација до лекари. Доколку ништо не се смени, за понатамошното делување ќе одлучи советот на Самостојниот синдикат“,  изјави Сузана Атанасовска, претседателка на синдикатот во Куманово.

 Здравствените работници се жалат дека со зголемување на минималната плата, не е направно линеарно зголемување на нивните плати и бараат тоа да се направи во најкраток можен рок.

„Со мирен протест излеговме да укажеме на неколку работи, а тоа е дека сакаме навремено земање на плата, второ договорот што требаше да биде потпишан за зголемување на платите на медицинскиот персонал, 3.000 бруто односно 2.000 денари нето на основица на плата, веќе три месеци се одолговлекува. Бараме тоа што е договорено во најкус можен рок да биде изреализирано. Секако дека и другите барања коишто беа предизборно ветени за зголемување на платата во здравството, не е спроведено ништо. Со новите измени Синдикатот ќе биде маргинализиран и нема активно да учествува во одлучувањето и во исплатата на плати а колективниот договор ставен по страна, што значи дека сите додатоци, како дежурства и празници ќе биде ставен под еден голем знак прашалник. Тоа не е добро за ниту еден здравствен работник и бараме Владата да излезе во пресрет на ниште барања“, рече Слаѓана Илиева.

Протестот траеше половина час за време на паузатат за доручек, поради што здравствената заштита на пациентите се одвиваше непречено.