Расте бројот на заболени од грип, пријавени нови 168 случаи во кумановско

Од Институтот за јавно здравје информираат дека од почетокот на сезоната, до сега на територијата на Куманово, Липково и Старо Нагоричане се забележани вкупно 860 случаи на грип и заболувања слични на грип, од кои 648 од почетокот на годината.

Според возрасната дистрибуција најголем број од инфицираните се на возраст од 15 до 64 години, потоа децата од 5 до 14 години, оние постари од 65 години, а најмалку заразени има кај доенчињата и малите деца до 4 години.

Лекарите препорачуваат заболените да останат дома, да не посетуваат работа или училиште и било кои места каде има поголема концентрација на луѓе. Препораките се да се конзумира лесна храна и многу течности, да се зголеми дневниот внес на свежи продукти со висока концентрација на витамин Ц, редовно проветрување на просториите, често миење на рацете со топла вода и сапун. За постарите од 65 години или лица со хронични болести советот е да се посети матичниот лекар и да не се користи терапија и други препарати на своја рака.

За зајакнување и одржување на имунитетот кај здравите лица се препорачува топло и слоевито облекување, топли бањи, користење на топли напитоци и супи, зголемен внес на витамин Ц, како и редовна психичка и физичка активност и избегнување на стрес.

Во Македонија до сега се вакцинирани повеќе од 70 илјади лица кои спаѓаат во ризичните групи- лица постари од 65 години, деца на возраст од 6 до 59 месеци, хронично болни, бремени жени и здравствени работници. Од комерцијалните вакцини кои се на располагање на граѓаните кои не спаѓаат во ризични групи дадени се 1.917 дози.