Зачленете се во нашиот клуб на читатели и најновите текстови ќе ги добивате на вашата мејл адреса
Проблемот со паркирањето одамна претставува голема пречка за нормалното функционирање на животот во нашата општина. Со децении локалната власт предводена од СДСМ, за време на предизборните кампањи, кога им треба поддршката од граѓаните, ветува дека ќе најде соодветно решение за недостигот од паркинг простор, но како и секогаш веднаш после изборите заборава на овој проблем. За локалната владејачка елита воопшто не е приоритет изградба на катни гаражи и други решенија за создавање на доволен паркинг простор во најголемата општина во државата, изјави Срѓан Ивановски од ВМРО-ДПМНЕ ОК Куманово.
Тој потсети дека актуелниот градоначалник Максим Димитриевски во својата програма ветуваше изградба на три катни гаражи, но се уште не ги реализираше.
„Единствен обид, кој се повеќе станува контроверзен, е поставувањето на монтажна конструкција на паркингот пред Центарот за култура, која се покажа како крајно нефункционална и дополнително го оптерети јавниот простор во центарот на градот, предизвикувајќи усложнување на дневниот сообраќај. Оваа импровизација од градба не претставува никакво решение за проблемот со паркирањето. Она што ќе остане како спомен, е помпезноста на свеченото отворање на оваа карикатура на која ако нема натпис, многумина ќе помислат дека е некоја летна бавча, тераса и слично. Овој комунален чир, измислен од локалната власт, уште повеќе го стеснува и онака недоволниот простор за непречен проток на луѓе и возила во центарот на градот. Општа констатација на кумановци е дека ова монтажна конструкција на Максим Димитриевски предизивикува голем револт кај граѓаните,“ кажа Ивановски.
Тој додаде дека како поминува времето сообраќајниот метеж и недоволниот паркинг простор стануваат се поголем проблем, кои актуелната локална власт очигледно нема намера да ги решава, туку само од време на време ќе реализира одредени квази - проекти кои претставуваат одраз на нивното лицемерие и цинизам со кој владеат 30 години во Куманово. Затоа јавно праша кога граѓаните на Куманово ќе добијат доволен паркинг простор?
(С.Н.)