Средновековен фестивал во Крива Паланка

На Градскиот плоштад и на сцената на летниот театар ќе биде поставен средновековен логор кој претставува реконструкција на  цивилизацијата од 5-15 век.

„На средновековен фестивал ќе бидат презентирани средновековни битки, занаетите како кожар ство, иконопис, книговез, грнчарство, резбарство, кулинарство, ковачкиот занает и други анимации. Питоа, секој посетител ќе може да види како од парче метал може да се роди врв на стрела, од купче глина – домаќински сад, од парче кожа – убав колан. Ќе има и работилница за изработка на средновековни шлемови, ревија на облека каактеристична за средниот век, како и концерти на средновековна музика и фолклорни игри. За фестивалот веќе постои голем интерес кај публиката од општината и државата, а секој посетител може да понесе спомен од средновековието преку фотографирање во автентична облека и амбиент“, вели Драган Величковски, директор на ЛУ Градски музеј Крива Паланка.

Учесници на средновековниот фестивал се Здружението „Чигот“ од Варна и Историскиот музеј од Ќустендил, Бугарија, Народниот музеј од Лесковац и претставници на локалните музејски установи од државата.

Организатор на овој редок и уникатен културно-едукативен настан  е Градскиот музеј од Крива Паланка, поддржан од Општина Крива Паланка  и ИПА програмата Бугарија-Македонија.

Средновековниот фестивал се организира во чест на Денот на ослободувањето на Крива Паланка, „8-ми Октомври“.