Зачленете се во нашиот клуб на читатели и најновите текстови ќе ги добивате на вашата мејл адреса
Новото законско решение за учебниците предвидува комбиниран модел на примена на учебници и други наставни и дидактички материјали, а ниту еден ученик нема да биде исклучен од наставата, потенцираше на прес конференција пратеничката на СДСМ од Куманово Лидија Тасевска.
Таа вели дека учениците од прво до трето одделение ќе добиваат печатени учебници, додека за учениците од четврто и погорните одделенија приоритетна опција се дигиталните учебници, а условите за нивна употреба ќе му бидат обезебедени секому.
„Она што ќе го нема, се милионските тендери за печатење на учебници од кои со години профитираше претходната власт“, рече Тасевска.
Со новиот Закон, според Тасевска, за првпат е обезбеден пристап до учебниците кои ученикот треба ги користи. За учениците кои се од социјално загрозени семејства и немаат уреди за учење од дигитални учебници, како и за учениците кои поради попреченост имаат потреба од уреди и/или помошна технологија, училиштето е должно да обезбеди услови за секој ученик да има пристап до употреба на учебник. За првпат се обезбедуваат и учебници во аудио формат, а воедно се печатат и учебници на Брајово писмо.
„Со новиот Закон се става крај на неквалитетните учебници кои уништуваа генерации ученици, учебници кои беа полни со дискриминаторски содржини, стереотипи, говор на омраза и поделби, а тоа не смее да биде причина за бојкот на наставата“, истакнува Тасевска.
Таа ги повика учениците и родителите да ги следат официјалните канали на комуникација на Министерството за образование и наука и останатите надлежни институции преку кои се информира јавноста за Законот за учебници, заради објективно и точно информирање на граѓаните.